गठबन्धन गर्दा साना पार्टी संसद्मा रहिरहने साना दलले अस्थिरता निम्त्याउने महासचिव पोखरेलको तर्क

काठमाडौं । नेकपा एमाले महासचिव शंकर पोखरेलले कांग्रेस र एमाले मिलेर सरकार बनाए पनि आगामी निर्वाचनमा बिना गठबन्धन एक्लाएक्लै चुनाव लड्ने बताएका छन् । 

एमाले पेसागत विशेष जिल्ला कमिटीले आज काठमाडौंमा आयोजना गरेको प्रशिक्षक प्रशिक्षण कार्यक्रममा उनले गठबन्धन गर्दा साना पार्टी संसद्मा रहिरहने र तिनले अस्थिरता सिर्जना गरिरहने जिकिर गरेका हुन् । अस्थिरता अन्त्य हुनुपर्छ भन्ने मान्यताका साथ एक्लाएक्लै चुनावमा जाने उनको भनाइ छ । 

राजनीतिक दलले मुलुक बनाउन नसकेको नभई मुलुक बनाउने परिस्थिति निर्माण नहुँदा समस्या भएको उनको भनाइ थियो । विभिन्न बहानामा देशमा उत्पन्न हुने समस्याका कारण राजनीतिक दलले सम्पूर्ण ध्यान विकास निर्माणमा लगाउन नपाएको पनि महासचिव पोखरेलको तर्क छ । 

उनले देश आर्थिक रूपमा कमजोर र सामाजिक रूपमा अराजक बन्दै गएपछि थप समस्या उत्पन्न हुन नदिन दुई ठूला राजनीतिक दल मिलेर काम गर्न थालेको जिकिर गरेका छन् ।