नेपालमा कमजोर शक्ति नै राज्य सत्ता सञ्चालनमा निर्णायक हुँदा राजनीतिक अस्थिरता मौलाएको छ : शंकर पोखरेल
स्टार संवाददाता 
काठमाडौं । नेकपा एमालेका महासचिव शंकर पोखरेलले नेपालमा कमजोर शक्ति नै राज्य सत्ता सञ्चालनमा निर्णायक हुँदा राजनीतिक अस्थिरता मौलाएको बताएका छन् ।
आज नेकपा एमाले केन्द्रीय प्रचार तथा प्रकाशन विभागको बैठकलाई सम्बोधन गर्दै पोखरेलले लोकतन्त्रमा जनताले पत्याएका दलले शासन गर्नुपर्ने बताएका हुन् ।
कानूनको सुधारद्वारा लोकतन्त्रलाई थप बलियो बनाउन सकिने भन्दै उनले नेपालको कानूनले नै पार्टीहरूलाई बलियो हुन रोकको टिप्पणी गरे ।
कानूनले राष्ट्रिय पार्टी बन्न नसकेका दलका सांसदलाई पनि पार्टी छाड्दा कारबाही हुने प्रावधान राखेर दलहरूलाई बलियो हुनबाट रोकेको पोखरेलको तर्क छ । राष्ट्रिय पार्टी नहुने दलका सांसदलाई स्वतन्त्र हैसियतमा राख्ने गरी कानूनी व्यवस्था हुनुपर्ने उनको भनाई छ । राजनीति अस्थिरताको बीचमा नागरिकको लोकतन्त्रप्रतिको भरोसा जोगाएर राख्न नसकिएकाले मुलुकलाई बर्बादीबाट जोगाउन कांग्रेस-एमालेले पहल लिनुपरेको पोखरेलले बताए ।
