रवि लामिछानेलाई सांसद् पदबाट निलम्बन नगर्न सभामुख घिमिरेलाई रास्वपाको आग्रह
स्टार संवाददाता 
काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेलाई सांसद् पदबाट निलम्बन नगर्न रास्वपाले सभामुखलाई देवराज घिमिरेलाई आग्रह गरेको छ ।
सोमबार सिंहदरबारमा भेटेर रास्वपाका सांसद्हरू सन्तोष परियार, सोबिता गौतम र गणेश पराजुलीले निलम्बन नगर्न आग्रह गरेका हुन् । जवाफमा सभामुख घिमिरेले यसबारे आफूहरु छलफलमा रहेको भन्दै संविधान, कानुन र संसद नियमावली हेरेर निर्णय गर्ने बताएका थिए ।
रवि लामिछानेविरुद्ध सहकारी ठगी, संगठित अपराध र सम्पत्ति शुद्धीकरण मुद्दामा कास्की जिल्ला अदालतमा आइतबार मुद्दा दायर भएको छ । रास्वपा नेताहरुले कांग्रेसका तत्कालीन सांसद् टेकबहादुर गुरुङको मुद्दाको उदाहरण दिँदै रविलाई निलम्बन गर्न नमिल्ने तर्क गरेका थिए । विशेष अदालतले गुरुङलाई भ्रष्टाचार मुद्दामा दोषी ठहर गरेपछि उनी संसदबाट निलम्वित भएको सूचना जारी गरेको थियो ।
