नेविसंघको योगदान अतुलनीय रहेकोले यसलाई अलग राखेर हेर्दा देशको इतिहास अधुरो हुने कांग्रेस महामन्त्री घिमिरेको भनाई

काठमाडौं । नेपाली कांग्रेसका महामन्त्री गुरुराज घिमिरेले नेपालको राजनीतिक इतिहासमा नेपाल विद्यार्थी संघ (नेविसंघ) को योगदान अतुलनीय रहेको र यसलाई अलग राखेर हेर्ने हो भने देशको इतिहास नै अधुरो हुने बताएका छन् ।

आइतबार पार्टी केन्द्रीय कार्यालय सानेपामा नेविसंघका कार्यकर्ताहरूले बुझाएको ज्ञापनपत्र ग्रहण गर्दै घिमिरेले संगठनको ऐतिहासिक गरिमालाई कसैले पनि कम आँक्न वा विस्मृतिमा धकेल्न नसक्ने स्पष्ट पारेका हुन् । 

पछिल्लो समय मुलुकमा विकसित नयाँ राजनीतिक परिस्थिति र निर्वाचनबाट नयाँ राजनीतिक दलहरूको उदय भएको सन्दर्भमा नेविसंघको भूमिका झन् सशक्त र प्रभावकारी हुनुपर्नेमा घिमिरेले जोड दिए ।