हावाहुरी र खराब मौसमका कारण आन्तरिक उडान प्रभावित, नेपालगन्ज र सुर्खेतको उडान रद्ध

काठमाडौं । खराब मौसमका कारण आन्तरिक उडानहरु प्रभावित भएका छन् । पश्चिम नेपालमा सक्रिय हावाहुरी र खराब मौसमको कारण त्रिभुवन अन्तर्राष्ट्रिय विमानस्थलबाट नेपालगन्जका लागि उड्न लागेका उडानहरू रद्द गरिएको हो ।

मौसम प्रतिकूल बनेसँगै काठमाडौं–नेपालगन्ज रुटमा सञ्चालन हुने बुद्ध एयरलाइन्स र यति एयरलाइन्सका उडानहरू रद्द गरिएको विमानस्थलले जनाएको छ। उडानका लागि विमानमा चढिसकेका यात्रुहरूलाई पुनः ओरालेर फर्काइएको सुरक्षा कार्यालयले जानकारी दिएको छ।

यसैबीच, भैरहवाका लागि यति एयरलाइन्सको उडान ढिलाइ भएको छ भने सुर्खेतका लागि निर्धारित उडान पनि रद्द गरिएको छ। पश्चिमी वायु सक्रिय भएसँगै लुम्बिनी प्रदेशसहित पश्चिमका विभिन्न जिल्लामा दिउँसै हावाहुरीसहित वर्षा भइरहेको छ । चट्याङ र मेघगर्जनसमेत भइरहेकोले उडानहरू धमाधम रद्द भएको विमानस्थलले जनाएको छ।