धनकुटामा बढ्यो अलैँची उत्पादन

काठमाडाैं । धनकुटामा अलैँचीको उत्पादन बढेको छ। अलैँची खेती गरिएको जमिन बढेपछि धनकुटामा अलैचीको उत्पादन बढेको हो। अघिल्लो वर्षको तुलनामा यस वर्ष ६.५२ प्रतिशतले अलैँची उत्पादन बढेको कृषि ज्ञान केन्द्र धनकुटाले जनाएको छ ।

धनकुटामा गत आर्थिक वर्षमा १२७ हेक्टर क्षेत्रफलमा अलैचीँ खेती भएकोमा यो आर्थिक वर्षमा १ सय ३३ हेक्टर क्षेत्रफलमा अलैचीँ उत्पादन भएको थियो, जसमा धनकुटामा गत आर्थिक वर्षमा ४० दशमलव ३ मेट्रिक टन अलैचीँ उत्पादन भएकोमा यस आर्थिक वर्षमा ४२.६४ मेट्रिक टन अलैँची उत्पादन भएको छ ।  धनकुटामा गत आर्थिक वर्षमा उत्पादकत्व प्रतिहेक्टर ०.३२ रहेकामा यस आर्थिक वर्षमा पनि प्रतिहेक्टर शून्य दशमलव ३२ रहेको ज्ञान केन्द्रले जनाएको छ । 

यसअघि ओसिलो पाखाभित्ता र खोलाखोल्सीमा मात्र अलैँची खेती गरिएकामा पछिल्लो समय कृषकले अन्न बाली छाडेर करेसाबारीमा पनि अलैँची रोप्न रोप्दै आएका थिए । विभिन्न रोगको प्रकोपसँगै अलैँची बगान सखाप भएको र नयाँ बगानले उत्पादन दिन थालेकाले क्रमिक रूपमा उत्पादनमा सुधार हुँदै गएको छ । दानाबाट उत्पादन गरिएको निरोगी बिरुवाले उत्पादन पनि धेरै दिने र रोगको प्रकोपको सम्भावना पनि कम हुने भएकाले कृषकले विजु बिरुवा रोप्ने गरेको ज्ञान केन्द्रले जनाएको छ ।

अलैँची विशेष गरी मसला, जडीबुटी तथा औषधिका रूपमा प्रयोग हुने गरेको पाइएको छ। अलैँची खेती धनकुटाका ७ वटै स्थानीय तहमा आंशिकरुपमा हुने गरेको छ । भिरालो, सेपिलो, ओसिलो र छहारी भएको जमिनमा उत्पादन हुने अलैँची खेती समुद्र सतहबाट सात सयदेखि दुई हजार १०० मिटर उचाइसम्म हुने गरेको छ ।