सुनकोशी नदीमा खसेको कार अझै परेन फेला, खोजी कार्य तिव्र रुपमा हुँदै

सिन्धुली ।काठमाडौंबाट ओलखढुंगाको सुनकोसी गाउँपालिका वडा नं. ३ सिस्नेरी तर्फ जाँदै गरेको यात्रु बाहक बसले ठक्कर दिएर सुनकोसी नदीमा खसेको  कार र सो कारमा सवार व्यक्तिहरुको  खाेजी कार्य जारी रहेको छ । सोमबार अपरान्ह् सुनकोसीमा खसेको कारको तिव्र रुपमा खोजि भई रहेको फिक्कल गाउँपालिका उपाध्यक्ष राजु बरालले जानकारी गराएका हुन् ।

मध्य पहाडी लोकमार्ग अन्तर्गत सिन्धुलीको फिक्कल गाउँपालिका–२ नवलपुरमा सुनकोशी नदीमा खसेको कारमा सवार सिन्धुपाल्चोकको जुगल गाउँपालिका ७ का अन्दाजी ३९ बर्षिया दिल कुमार लामा र सिन्धुलीको गोलन्जोर गाउँपालिका १ का स्काभेटर चालक गणेश थापा, सिन्धुलीको तीनपाटन गाउँपालिका ९ डाँडाखर्कका १७ बर्षिया सुजन बलमपाकी मगर रहेका छन् ।

उनीहरुको खोजी कार्यलाई थप तिव्रता दिन सिन्धुपाल्चोकको जुगल गाउँपालिका अध्यक्ष रेशम स्याङबो लगाएतको टोली घटना स्थल पुगेको बरालले बताए । सुनकोशी नदीमा बेपत्ता भएका तीन जना र कारको खोजी कार्य भए पनि अहिले सम्म नभेटिएको उपाध्यक्षले बरालले पुष्टि गरेका छन् । सोमबार दिनभरको खोजी कार्य असफल भएपछि राति ८ बजेपछि खोजी कार्य स्थगित गरिएको थियो । बरालका अनुसार मंगलबार बिहानैदेखि पुनः खोजी कार्य अगाडि बढाइएको छ । यद्यपि केही पनि फेला परेको छैन ।

बागमती प्रदेश ०८–००१ ख ०१४४ नम्बरको बसले सोही दिशामा रोकि राखेको सडक विभाग यान्त्रिक कार्यालय मुल्कोट अन्तर्गत मध्य पहाडी लोकमार्गको पुनर्निर्माण कार्यमा संलग्न कम्पनीको प्रदेश ३–०१–०२४ च ९५७३ नम्बरको कारलाई ठक्कर दिएको थियो । सोमबार दिउँसो १२ः४५ बजे बसको ठक्करबाट कार सडकबाट करिब ५० फिट तल सुनकोसी नदीमा खसेको थियो ।

सो बस चालक फिक्कल गाउँपालिका–६ निवासी २६ वर्षीय हेमबहादुर तामाङ रहेको र उनलाई सोमबार नै प्रहरीले नियन्त्रणमा लिई इलाका प्रहरी कार्यालय खुर्कोट हुँदै सिन्धुलि सदरमुकाम लगेको उपाध्यक्ष बरालले जानकारी गराएका छन् । घटनापछि खोजी कार्यको लागि विपद् व्यवस्थापन वेश खुर्कोटबाट शसस्त्र प्रहरीको गोताखोर टोली सहित नेपाल प्रहरी, नेपाली सेना र स्थानीयको सहभागितामा बेपत्ता भएका व्यक्तिहरूको खोजी गरिएको छ ।

सुनकोशी नदीको बहाव ठूलो भएकाले बेपत्ता कार र मानिसहरुको खोजीमा समस्या भएको छ । बर्षायामको समय र सागुँरो ठाउँ भएकाले नदीको तिव्र बहाव, धमिलो पानीका कारण खोजी कार्यमा समस्या भएको जिल्ला प्रहरी कार्यालय सिन्धुलीका प्रहरी उपरिक्षक रविन्द्र बहादुर सिंहले बताएका छन् ।

फिक्कल गाउँपालिका वडा नं. २ नवलपुरमा पीडित परिवारले मंगलबार बिहानैदेखि सडक चक्काजाम गरेको जिल्ला प्रहरी प्रमुख एसपी सिंहले जानकारी गराएका छन् । उनीहरूले उचित क्षतिपूर्ति र वार्ताको माग गर्दै मध्यपहाडी लोकमार्गमा टायर बालेर सडक अवरुद्ध गरेका हुन् ।

 सिंहका अनुसार पीडित पक्षसँग वार्ताको पहल भईरहेको र उक्त स्थानमा डीएसपी विजय श्रेष्ठको नेतृत्वमा सहजीकरण भइरहेको छ । स्थानीयले दुर्घटना भएको २४ घण्टा वित्न लाग्दा समेत नभेटीएकोले बेपत्ता रहेका व्यक्तिहरुको खोजी कार्य तीव्र हुनुपर्ने बस धनी र समितिले घटनालाई बेवास्ता गरेको, घटनाको सत्य, तथ्य छानबिन गरी दोषीलाई कडा कारवाही गर्नुपर्ने  र उचित क्षतिपूर्तिको माग गर्दै पीडित परिवारले सडक अवरुद्ध गरेका हुन् ।

 बेपत्ता व्यक्तिहरुको खोजीलाई थप सहज गराउन स्थानिय जनप्रतिनीहरुले सकेसम्मको सहजीकरण गरिरहेका छन् ।