झाडापखालाका कारण बालकको मृत्यु
३ भदौ २०८१, सोमवार 
स्टार संवाददाता
स्टार संवाददाता 
काठमाडौं । खोटाङमा झाडापखालाका कारण एक बालकको मृत्यु भएको छ । दिप्रुङ चुइचुम्मा गाउँपालिका–१ याम्खा निवासी युवराज भुजेलका चार वर्षीय छोरा दीपशनको मृत्यु भएको हो ।
तीन दिनदेखि झाडापखालाबाट ग्रसित दीपशनको आइतबार साँझ जिल्ला अस्पताल खोटाङमा उपचारका क्रममा मृत्यु भएको प्रहरीले बताएको छ ।
बालकलाई धेरै पटक झाडापखाला भएको र सिकिस्त बनेको खबर पाएपछि थप उपचारका लागि स्थानीयको सहयोगमा जिल्ला अस्पताल लगिएको थियो ।
भुजेल परिवारमा अन्य दुई जनालाई पनि झाडापखालाको समस्या देखिएको बताइएको छ । बिरामीलाई घरैमा राखेर गाउँपालिकाको ‘हेल्लो डाक्टर’ कार्यक्रममार्फत उपचार भइरहेको जनाइएको छ ।
आर्थिक अवस्था कमजोर भएका कारण अभिभावकले समयमै उपचार गराउन नसक्दा बालकको मृत्यु भएको र दाहसंस्कार लागि शव घर लैजान पनि चन्दा सङ्कलन गरिएको छ ।
