आठौं पटक स्थगित भयो नेपाली कांग्रेसको बैठक, अब सोमबार २ बजे बस्ने

काठमाडौं । नेपाली कांग्रेसको केन्द्रीय समिति बैठक आठौं पटक पनि स्थगित भएको छ । यसअघि सातौं पटक स्थगित भएर आजका लागि तय भएको बैठक सोमबारसम्मका लागि स्थगित भएको हो । 

कांग्रेस केन्द्रीय कार्यालयका मुख्यसचिव कृष्णप्रसाद पौडेलले पार्टीको बैठक सोमबार दिउँसो २ बजे बस्ने गरी स्थगित भएको जानकारी दिएका छन् । १५औँ महाधिवेशन नियमित गर्ने कि विशेष भन्ने विषयमा कुरा नमिल्दा बैठक आठौं पटक स्थगित भएको हो । 

महाधिवेशनको कार्यतालिका तय गर्न गत असोज २८ गतेदेखि केन्द्रीय समितिको बैठक बस्दै आएको छ । तर १२ वटा बैठक बस्दा पनि कुरा मिल्न सकेको छैन । 

पटक–पटक गरी ८ पटक त बैठक नै सारिएको छ । केन्द्रीय समिति बैठकमा महामन्त्री गगन थापा र सहमहामन्त्री महेन्द्र यादवले कार्यतालिकाबारे छुट्टा–छुट्टै प्रस्ताव पेस गरेका छन् । नियमित नभए विशेष महाधिवेशन गर्नुपर्ने भन्दै ५४ प्रतिशत प्रतिनिधिले हस्ताक्षरसमेत बुझाइसकेका छन् । 

तर, संस्थापन पक्षले फागुन २१ गते हुने प्रतिनिधि सभा सदस्य निर्वाचनपछि मात्र महाधिवेशन गर्नुपर्ने अडान राखेको छ । हिजो सभापति शेरबहादुर देउवाले निर्वाचनपछि मात्रै महाधिवेशन गर्नुपर्ने अडान राखेका आफू निकट नेताहरु कृष्णप्रसाद सिटौला तथा विमलेन्द्र निधिसँग छलफल गरेका थिए ।

उनीहरुलाई पुस महिनाभित्रै महाधिवेशन गर्ने गरी तयार रहन भन्दै देउवाले कार्यवाहक सभापति पूर्णबहादुर खड्कालाई महाधिवेशनको तालिका बनाउने जिम्मेवारी दिएका थिए ।  

त्यसअघि देउवाले महामन्त्रीद्वय गगन थापा र विश्वप्रकाश शर्मालाई भेटेर पुसभित्रै नियमित महाधिवेशन गर्न तयार रहेको जनाउ दिँदै विशेष महाधिवेशनका लागि पेश गरिएको प्रस्ताव फिर्ता लिन आग्रह गरेका थिए । महामन्त्रीद्वयले भने महाधिवेशनबारे आश्वस्त हुने अवस्था नरहेको भन्दै ५४ प्रतिशत प्रतिनिधिको हस्ताक्षर सहितको निवेदन फिर्ता नलिने बताएका छन् । 

सभापति देउवा पुसभित्रै महाधिवेशन गर्न तयार भएपछि कार्यवाहक सभापति खड्काले बैठक पुनः एक दिनलाई धकेलेर संस्थापन पक्षका अरु नेतासँग छलफल थालेको बताइएको छ । भोलिका लागि सारिएको बैठकमा खड्काले महाधिवेशनको खाका पेश गर्ने अनुमान गरिएको छ ।