बालुवाटार नजिकै युवाहरूको प्रदर्शन, ५ वर्षे हदम्याद खारेज गर्न माग
स्टार संवाददाता 
काठमाडौँ । विभिन्न माग राख्दै युवाहरूको समूहले बालुवाटारनजिकै शनिबार प्रदर्शन गरेको छ ।
उनीहरूले भ्रष्टाचारीलाई जोगाउने नियतले ल्याइएको ५ वर्षे हदम्याद खारेज गर्न माग गरेका हुन् । त्यस्तै गिरिबन्धु टी स्टेट, भुटानी शरणार्थी, ललिता निवास लगायतका अनियमितताको काण्डमा यथाशीघ्र निष्पक्ष अनुसन्धान गर्न तथा वित्तीय क्षेत्र, बैंक सहकारी, लघुवित्त, मिटरव्याजी पीडितहरूका समस्या तुरुन्त सम्बोधन गर्न पनि माग गरेका छन् ।
आजसम्मका सबै शीर्ष नेताका सम्पत्ति छानबिन गर्नको निम्ति नागरिकको तर्फबाट स्वतन्त्र नागरिक आयोग गठन गर्न पनि उनीहरूको माग छ । विद्युत् प्राधिकरणले विभिन्न व्यापारीबाट उठाउनु पर्ने २२ अर्ब २४ करोड रकम तत्काल असुल गर्न उनीहरूले माग गरेका छन् ।
यता विदेशमा रहेका नेपाली नागरिकको मताधिकार सुनिश्चित गर्न र वैदेशिक रोजगारको क्रममा विभिन्न माध्यमबाट पीडित भएका सम्पूर्ण नागरिकका समस्या समाधान गर्न उनीहरूले माग गरेका छन् ।
