खेलकुद क्षेत्रमा राजनीति हावी हुँदा समग्र खेलकुद नै प्रभावित भइरहेको एनओसीका अध्यक्ष श्रेष्ठको भनाई

काठमाडौं । नेपाल ओलम्पिक कमिटी (एनओसी)का अध्यक्ष जीवनराम श्रेष्ठले खेलकुद क्षेत्रमा राजनीति हावी हुँदा समग्र खेलकुद नै प्रभावित भइरहेको बताएका छन् । सोमबार काठमाडौंमा एनओसीको २१औं साधारणसभाको उद्घाटन गर्दै अध्यक्ष श्रेष्ठले खेल क्षेत्रका अधिकांश विवाद अदालतसम्म पुग्नुको मुख्य कारण राजनीति भएको उल्लेख गरे ।

यसले खेलकुदको विकासमा नकारात्मक असर परेको उनको भनाइ थियो । एनओसीभित्रै अनावश्यक विवाद सिर्जना हुँदा आफ्नै भवन हुँदाहुँदै पनि संस्थाले ‘घरवारबिहीन’ अवस्था भोग्नुपरेको उनले बताए । अध्यक्ष श्रेष्ठले प्रतिकूल परिस्थितिका बीच पनि नेपालको खेलकुद विकासका लागि एनओसी सक्रिय भएर लागिरहेको स्पष्ट पारे। नेपालमा ओलम्पिक अभियानलाई चिनाउने काम एनओसीले नै गरेको दाबी गर्दै उनले अन्तर्राष्ट्रिय जगतले पनि नेपालको ओलम्पिक गतिविधिलाई सकारात्मक रूपमा हेरिरहेको बताएका छन् । 

खेलकुद सङ्घहरू स्वायत्त संस्था भए पनि राष्ट्रिय खेलकुद परिषद् (राखेप)बाट अनावश्यक हस्तक्षेप हुने गरेको आरोप अध्यक्ष श्रेष्ठले लगा्ए । केही व्यक्तिको स्वार्थका कारण ऐनले तोकेको चार वर्षे अवधिमा सङ्घहरूको निर्वाचन हुन नदिइएको उनको जिकिर थियो । यसैबीच, अध्यक्ष श्रेष्ठले आगामी एसियन गेम्समा सहभागिताका विषयमा खेलकुद मन्त्रालयसँग छलफल गरिने जानकारी पनि दिएका छन् ।