सुडानमा द्वन्द्वका कारण विस्थापित बालबालिकाहरूलाई सुरक्षा दिन युनिसेफको आह्वान

काठमाडौं । संयुक्त राष्ट्र बाल कोष (युनिसेफ) ले सुडानमा द्वन्द्वका कारण विस्थापित लाखौं बालबालिकालाई सुरक्षा दिन तत्काल कदम चाल्न आह्वान गरेको छ । दार्फुर र कोरडोफान क्षेत्रका केही भागमा भोकमरीको स्थिति घोषणा भइसकेको छ । युनिसेफका अनुसार सुडानमा विस्थापित कुल मानिसमध्ये आधा बालबालिका छन् ।

विशेष गरी दार्फुर र कोरडोफानसहित पहुँच गाह्रो क्षेत्रका बालबालिका असुरक्षित छन्, किनभने उनीहरूलाई खाद्य, सफा पानी र औषधि प्रायः उपलब्ध छैन । सुडानका बालबालिका निरन्तर हिंसा, भोक र डरको बीचमा बाँचिरहेका छन् । उत्तर दार्फुरमा हिंसाका कारण हजारौँ मानिस विस्थापित भएका छन् । 

बालबालिका प्रायः मानसिक स्वास्थ्य सहायता, लैङ्गिक हिंसाबाट सुरक्षा र अन्य आधारभूत सेवाबाट वञ्चित छन् । युनिसेफले विस्थापित बालबालिकालाई परिवारसँग पुनर्मिलन गर्नु, लैङ्गिक हिंसाबाट बचाउने सहयोग, मानसिक स्वास्थ्य समर्थन र सुरक्षित पानीको पहुँच सुनिश्चित गर्ने जस्ता प्रयासहरू गर्दै आएको छ । 

संयुक्त राष्ट्र सङ्घले हिंसा तुरुन्त रोकिने आह्वान गर्दै सबै पक्षलाई अन्तर्राष्ट्रिय मानवीय कानुन पालना गर्न र प्रत्येक बालबालिका र नागरिकको सुरक्षा सुनिश्चित गर्न आग्रह गरेको छ ।