सामान्य प्रशासनमन्त्रीमा भगवती न्यौपाने

काठमाडौँ । संघीय मामिला तथा सामान्य प्रशासनमन्त्रीमा भगवती न्यौपाने नियुक्त हुनुभएको छ ।

घुस ‘डिल’ को अडिओ काण्डमा मुछिएका यसअघिका मन्त्री राजकुमार गुप्ताको राजीनामा स्वीकृतसँगै राष्ट्रियसभामा नेकपा एमाले प्रमुख सचेतक रहनुभएकी न्यौपानेलाई नियुक्त गरिएको हो । 

प्रधानमन्त्रीको सिफारिसमा न्यौपानेलाई नियुक्त गरिएको राष्ट्रपतिको कार्यालयले जनाएको छ । तनहुँकी न्यौपाने अनेरास्ववियुको विद्यार्थी राजनीतिबाट आउनुभएको हो ।

न्यौपाने अनेम संघ तनहुँको सचिव हुँदै दुई कार्यकाल अध्यक्ष बन्नुभएको थियो । तनहुँ एमालेको जिल्ला सचिव निर्वाह गरिसक्नु भएकी न्यौपाने राष्ट्रियसभा, विधायन व्यवस्थापन समितिको सदस्य समेत हुनुहुन्छ ।